2010/03/30

ليش الناس بالكويت معصبين







ليش الناس بالكويت أشكالها معصبين .....  والناس زهقانين .... والويوه  مبوزين

فى الحديث الشريف عن الرسول الاكرم صلى الله عليه واله وسلم  ...
                      تبسمك فى وجه أخيك صدقة  ....   
وفى حديث آخر   ماحجبنى النبى ولارآنى إلا وتبسم فى وجهى .....
 وأيضا قال       أنكم لن تسعوا الناس بأموالكم فليسعهم منكم بسط الوجه وحسن الخلق

'طلعت اليوم من البيت  عندى شغلتين بوزارتين  وشغلة بمستشفى مرورا بالجمعية , كل مره وأنا بالسيارة أفكر بشئ معين أو أتراهن مع روحى مرات , اليوم بغيت أشوف جم مبتسم وجم واحد معصب أو مبوز ,  أول ما طلعت من الباب عطانى البنغالى اللى ينظف الفريج النشيدة الصباحية وبصوت عالى  ... السلام عليكم ....  وكان خاش ويه بالغتره لكن مبين من عيونة معصب 

 بالا شارة اللى عاليمن واحد بالسيارة يتكلم بالتلفون حده معصب ويسوى حركات بإيدة  مثل أوريك وياويلك , واللى عاليسار وحدة بوزها لسكان السيارة  ولابسة نظارة , بالوزارة الاولى  دشينا الكاونتلر سلمنا  بالغصب يردون , ولما شوية تزور عليهم بالكلام يعصبون , بالوزارة الثانية  حاطين واحد توه متعين  ويايب ريوق وجرايد ومسوى( نسفت الجرجور) يعنى الغترة متروسة نشا وصايرة حطبه , ولما سألته عن المعاملة قال لى  السستم خربان وهو يكلمنى ياله مسج وبعدها تغيرت ملامح ويهة عصب وقام , ماأدرى شيللى كدره بالمسج  !!! 

مريت المستشفى الكل زعلان ومعصب ولاواحد يبى يطل بوية الثانى لاالموظفين ولاالمراجعين  , وكل ما تمشى تسمع   أوفففففففففففففف  , شهالحالة شهالسالفه , خلصنا من المستشفى دشينا الجمعية عند الباب وحدة أول مادشت معصبة وقالت حة السيكيروتى قطيعة ويهك ييب اليهد  , عند الكاشير الناس نا طره بالدور  تسمع أوففففففففففففففف    وأففففففففففففففففف ,  وأشكال الناس معصبة ومتضايقة , وقبل ما نرجع البيت   واحد لف على الثانى وبعدها  صار هرنات  وبعدها  يتساببون بالشارع   أووووووووووه 


عكس أوربا بالضبط , ويهك راح يعورك من كثر توزيع الابتسامات وطايحليه ... هااالوووو    .. هاالووو ... هاالووو ...  وحتى الناس عندها مشاكل وغيرها ولكنهم  مبتسمين ايجابيين متعاونين لأبعد الحدود  ( غالبا ) ,  وسلام رمشة العين  مع ابتسامه سريعة  

قد يكون لهذا الموضوع أسباب كثيرة من بينها
البيئة القاسية    ........ 
  المناخ ........
  نوعية البشر والاوادم ........ 
 التربية .......
 التعود ......
 العنف  بالمدارس ... 
 الوضع المزرى الداخلى لما يعانونه الناس من مشاكل داخلية  ( ازدحام  واسطات    شعور بالظلم  ..... الخ  )    .. 
  وقد يكون الغزو  غير  نفسية وأطباع الناس ؟؟؟
  كما إنى ألاحظ المتدينين  أكثر غلاظة  , وأكثرهم  عسرين ناشفين مع إنهم المفروض  يتبنون التسامح والايجابية  والابتسامة .


أبتسم لأنك تدخل لنفسك السرور قبل غيرك , وحتى إذا الوضع مايساعد بغض النظر عن الاسباب ... تفائل   .. تفائلوا بالخير تجدوه

ونصيحتى لك أشرب عصير ليمون .... أو لمونادا


47 comments:

أبو الدســتور said...

تعددت الاسباب والنتيجة واحدة

Sami said...

:(

سلة ميوّة said...

مسى الخير...



سؤال صعب!!!!


ماعندي له رد..


بس اعتقد لو ابتسمنا وبدينا بنفسنا..راح يمشون الناس ورانا


( ما اقصد انهم هبّه ويموتون عالتقليد:P )

بس اعتقد كل شي يبدي من الداخل..
انا عن نفسي اوزع ابتسامات...


على طاري الابتسامات...اذكر بمطار لندن عطيت الي على الكاونتر جوازي

وانا اتبوسم

سألتني

هي:اتعرفيني؟شايفتني من قبل؟


انا :انصدمت قتلها لأ ..اروح وارد على لندن بس اول مره اشوفج:)ليش؟؟؟

هي : لا تبتسمين عبالي اعرفج


انا : احنا ناس سمحين وحليوين وانوزع ابتسامات


هي : معصبه وماعلقت!!!




هذي اوربا....
في كل مكان في الشين والزين...

اختار انت شنو تبي اتشوف:)


ابتسامه بعرض السما


وسجل حضوري:)

نمووول said...

تصدق في دراسات على هذا الموضوع وخرجوا بنفس الاسباب الي ذكرتها تقريبا ..

اتوقع التنشئة الاجتاعية هي السبب
الكل متشنج بكل مكان ..

تحياتي

q8-lawyer said...

إي والله ليش أشكال الناس بالكويت معصبين!!!!
الظاهر في مثل متبع من الجميع وهو>>


((لاتبتسم للناس ترا عيييب))

وانا بعد ملاحظه الناس بالسيارات خصوصا وقت طلعة الدوامات يتكلمون بالموبايل وأهمه حدهم معصبين ومنفعلين!!
وبعد البنات الله يهداهم فيهم طبع كلش موحلو يخزون الواحد من فوق لي تحت وأهمه مادين البوز ومكشرين ما أدري ليش!!

بصراااحه بوست وااايد حلو

رورو الشخبوطه said...

وفي ناس خلقه شكلها جذي :)

مع هذا نبتسم بويوه الناس طبعا البنات او الحريم الرجاله نهيه مايصير باجر نبتلش فيه :p

وفي ناس تبتسم لها جنها سابها :\

ومشكور..

ٵنثے ملآئكيـﮧ ~ said...

أزيدك من الشعر بيت
اليوم بالكلية بمركز التصوير طالبة دشت تبي ورقة قالت حق الي تشتغل أبي تطبعين لي هالاوراق و قاعدة تأشر هذي مافهمت قالت حق السوري ولا تقولها انو وحده و البنت تأشر مو عارفة اسم الدكتور او المذكره فقاعده تقول هذي الي مدبسه تطالع و تقولها انو وحده تقولها المدبسه و تأشر إي خو روحي شوفي عيزانة ولا تعصب ع البنت يا بنتي كلهن مدبسين تقولها الي في خط وردي و تزيد العبط :/
و أسلوبهآ مو صج ، مسكينة البنت ما تسوى عليهآ
:
يعني مآ شآء الله بـ الكويت محد يحب النجرة ، أصلاً ما يصير يمر اليوم من غير نجرة :/
الله يهدينآ لوول

AM.SA.CHANNEL said...

مــا أعتقد إنه الغزو له دخل في الموضووع ههههههه..
بس الله يعينكم جان جي، تقول الواحد مب طايق شغله مب حاله ..

بس نحنا عنا في دبي فرق شوي نادر ما تلقى جي أصلن، و تحس الشغل شغل عنا، ماشي وقت حق التبويز، أنا داشة كذا وزارة أكمل أوراقي،يبتسموون و يعاملونا عدل، إلا عدد بسيط جدا مايبتسموون .. لأنه يعرف إن بوز و ما عاملنا عدل في شؤون قانونية أو الإج آر على طول شكوى عليه

BookMark said...

وايد أسباب ضغوطات الحياة والحر والزحمة والأسباب اللي تفضلت فيها

بس هم لازم نبتسم :)

أحمد الحيدر said...

يبيلهم بندول :)

عسى الله يديم علينا وعليك الرواق

املح واجلح said...

نسيت سبب مهم جدااا الخردة , عيل الناس تبى 5000 ياحكومه عطوووهم ولا الدسم مايتوزع ترى يسوى حارج ,
شوفوا شعب الامارات شلون تعامله وربعنا وعليه عليهم عاقدين النوونه من الصبح ليه ينامموون , ويدرون ديرة الخير ملياننننننه دسم بل عالى الدسم

..pen seldom said...

والله حالــه !

بداية , تفكيرك أنك اليوم راح تركز على شيء معين قبل خروجك من المنزل , هذا شيء أسويها أنا أيضاً , وخصوصاً إذا وقفنا في إشارة .. وفي الجامعة

بالنسبة للسعودية , ما اقولك أنهم رآيقين وسمحين وعلى طول مبتسمين ,

لكن أحس أني أغلب الأوقات أشوف الأبتسامات أكثر ,, " يمكن لأني أتعامل مع مجتمع النساء " !

ومثل ماقلت .. العوامل اللي ذكرتها سبب من أسباب العبوس .. الدائم
يبي لك تشوف الوضع يوم الإجازات , يمكن تشوف الجانب الآخر المبتسم من الجميع

=)

وأنا مثلك في رأيك أن بعض المتدينين أكثر غلاظه !!

ودي أعرف بس ليــش ؟



... كنت هنــا

دكتور كويتي said...

salam
A smile is an inexpensive way to change your looks. ~Charles Gordy

aL-NooR . said...

مثل ما قال
اخوي احمد الحيدر
ماكو الا بنادول


عفية شوف اعصاب الكويتيين
بالدرب الصبح روحة الدوامات

****************

المقوع الشرقي said...

يا حلوهم بره كلمن يقول
غود مرنينغ
مستبشرين

:)

أهنى أعتقد
العيوش+اللبن له تأثير

:)

:)

تقبل مروري الأول

واحة خضراء said...

هالوو

^_^ الظاهر هي سمة خاصة بالوزارت ، كله مالهم خلق ويالله يالله يرفع راسه حق يشوف وش يبي المواطن ..


يالله مثل ماقال سلة ميوّة ابتسم حق يبتسمون ، واطبع جو الاوربيين على الاخريين ..

بالتوفييق

بو ذياب said...

خلني من البوست وسالفة المعصبين بس انت رايح وزارتين ومستفى وجمعية ..
امانه من الزحمة الساعة جم طلعت والساعه جم رديت :)
وبعد الزحمة قدرت ترجع وانت مبتسم

panadool said...

أبو الدســتور


النتيجة شنو ؟؟

تحياتى لك

panadool said...

Sami

كربونك والله

شكرا على مرورك يالغالى

panadool said...

سلة ميوّة


صح فى كل مكان أكو زين وشين لكنها مسألة نسبية عندنا وايد وعندهم شوية

شكرا على مروركم من مدونتى

panadool said...

q8-lawyer


أوووه الخز هذا موضوع ثانى بعد

شكرا على مروركم من مدونتى

panadool said...

نمووول

فعلا هى من ضمن الاسباب

وأسباب أخرى

شكرا على مروركم من مدونتى

panadool said...

رورو الشخبوطه

إشلون الكوكى معاج

تحياتى الحارة

panadool said...

ٵنثے ملآئكيـﮧ ~


الكويتيين يموتون على النجره والمعايات

وكله معصبين حتى نشروا عدة الاعصاب للوافدين

حتى المصاروه والسوريين والبنغال والهنود الكل معصب

تحياتى الحارة الزميلة المتواصلة دائما

panadool said...

AM.SA.CHANNEL

الامارات غير والكويت غير ولكل دولة موضوعها الخاص

لكن على طارى الغزو

النفسيات والحروب تأخذ دور مهم من سلوك الناس

شكرا على مروركم من مدونتى

panadool said...

BookMark

على قولتك لازم نبتسم

شكرا على مروركم من مدونتى

panadool said...

أحمد الحيدر

لوووووووووووول

يبيلها بنادول على قولتك

ماقلت لى شنو سميت البنات عسالله يخليهم لك ؟؟

تحياتى الحارة

panadool said...

املح واجلح

طبعا هذا سبب مهم

بس هم إحنا بخير ونعمة

قروض زواج واسكان وعلاوات أولاد وغيره

بس الانسان دايما يبى أكثر

ويمكن تقصد إن حالتنا الماديه لازم أحسن وأنا متفق معاك

شكرا على مرورك من مدونتى

Made n Q8 said...

لوول كلش عاد ولا الصبح حزه طلعه الدوامات واذا بعد مره ومعاها عيالها تحس وحده ماكله تبن واعليا خخ

بس اذا ابتسمنا قالوا طالع الهبيله تبتسم صج خفيفه!! واذا خلينا ويههنا عادي بدون تعبيير قالوا شدعوه ضحكي شوي

يعني بالله شسوي احطلي ويهين واقعد اغير فيه لووول
بس انا عندي الواحد يعصب بويهي ولا يقعد يسويلي اشعه مقطعيه بالخز :s

panadool said...

pen seldom

الكثير يلاحظ المتدينيين بأنهم أشد غلاظة وقسوة والاسباب تختلف

أما بالنسبة للسعودية
برحلات الحج والعمرة الناس صعبين وعسرين
حتى بالمرور الى البحرين والامارات لما نمر على السعودية
طبيعتهم جدا قاسية أما باقى مدن السعودية لاعلم لى

شكرا على مرورك من مدونتى

panadool said...

دكتور كويتي

Praise be to God that smile free
of charge and without money
Thanks for the password

panadool said...

aL-NooR .

شايفهم ماكو أخلاق وأعصاب

وعليكم بالبندول
أو لما تشوفون البندول تذكرونى

شكرا لمروركم من مدونتى

panadool said...

المقوع الشرقي


لوووووووووووووووووول

مالة شغل العيوش واللبن

أشرب عصير ليمون

شكرا على مروركم من مدونتى

panadool said...

واحة خضراء

هلا بالزميل المقصر

الله يسمع منك يارب

تحياتى الحارة

panadool said...

بو ذياب

هلا بالحبيب الغالى

طلعت 8 وربع
ورجعت 1ونص

تدرى عندنا حكومة ألكترونية ونقدر نسوى كل شغلنا بالنت

الحمد لله على كل حال


تحياتى الحارة وشكرا على مروركم من مدونتى

ANGEL HEART said...

معاك حق مع انه الاوضاع المعيشيه والماليه ممتازه بس مع هذا معصبين ومتقدرين والكل يشكي

وبيني وبينك انا كنت ابتسم الحين لا صرت احترم نفسي وابتسم بس حق الاجانب لان اذا الطرف الثاني ريال يفهمها غلط واذا وحده غالبا تكون معصبه وتبادل الابتسامه بخز :)

تحياتي

حياتي هدف مو عبث said...

الجو يخلي الواحد يعصب
شوف بالشتا اشوي الناس هاديين
حتى بالشارع ماكو مناجر نفس الصيف
عاد الصيف ووقت طلعة الدوامات
ويبون يلحقون على الغدا وزحمة وامسفلين فيهم بالشغل
تشوف شياطين بالشارع مو أوادم

أذكر شفت أم مع عيالها
كلهم امكشرين
مع انه يهال بو 3 سنوات أو 4
بس من وي الأم عرفت ان هذا وراثة

الله يعين

Q8-HANDICAP said...

صح اللسانك

انا نفس الشي من اخل مستشفى انعفس والله نفسي بخشمي اكره الدكاتره والنيرس واحسهم مايفهمون شي

ولمن اكون في امريكا امبييييييييييييه عالم ثاني شعور غييير

انا اتقوع ان الجو له دور كبير

..pen seldom said...

الشرقية وبالخصوص " الاحساء " غــير

=)

أهل الطيبة والكرم

للأسف شفت الجانب السيء من المجتمع

..

إن شاء الله في زيارات أخرى تشوف الجانب الطيب منـا ..

panadool said...

ANGEL HEART

على قولتج المجتمع ماتدرى شتسوى فيه

تبتسم وإلاتبوز

شكرا على مروركم من مدونتى

panadool said...

حياتي هدف مو عبث


لووووووووووووول

شياطين عاد

صح للجو والحرارة عامل كبير ومهم للأعصاب والنفسيات

شكرا على مروركم من مدونتى

panadool said...

Q8-HANDICAP

صح لكن مو كلة على الجو الاسباب مختلفة

يعنى وقت الشتا إشلون ؟؟؟

أو فى دول رطوبة وحارة مثل ماليزيا وسنغافورا

يمكن بعد نوعية الناس

شكرا على مروركم من مدونتى

panadool said...

pen seldom

والله أدرى من كثر ما سمعت عن أهل الحسا والشرقية إنهم طيبين ويحرجون الناس بتواضعه

لكن ولامره زرتهم وإنشالله إذا الله كتب نشوفهم
لكن أهل مكة والحجاز الله يعينهم على عمرهم

شكرا على مروركم من مدونتى

Abdullah said...

it all depends on how you want to live your life.

You decide.

الحــــر said...

والله ياخوك هذي مو مشكلة هالأيام أنا تعودت على جذي الحين لي شفت الناس يضحكون احس في شي مو طبيعي لا ومرات الواحد يطالعك جنه يطالبك

والله يا بندول شكلي بصور نفسي وانا اضحك وبدزلك ياها وكل يوم عاد انت صبح بوييهي
:)
بس أخاف انت بعدين ما تضحك

:)

حبيب ياخوك اخذ الدنيا سهاااله

king said...

الناس معصبه ومكشره لان قروض +طلاق +السياره خربانه + العيال +هم الدوانيه+الزوجه+البيت+كثير وكثير وكثير من الهم لازم يكشر مهموم من كل الجوانب والحمدالله رب العالمين

Anonymous said...

lovely jubbly fantastic thanks so much

Visit my weblog :: accident claims