2010/09/28

إقتراح للدوسري






حتى الدورية مو قادرة تمشي


الخبر المتكرر فى معظم صحف يوم أمس هو  الإزدحام المروري ,  تطرقنا لهذا الموضوع سابقا فالإزدحام له أسباب ومسببات وبعض الحلول  , ولكن أذكر إنني قرأت عن حل من الحلول قامت بها بعض إدارات المرور فى أمريكا وتم تطبيقها في بعض المدن الكندية وهي جديرة  بالدراسة بل حتى التطبيق .

سأشرحها ومدى إمكانية تطبيقها بالكويت
أوقات الذروة  فترتين الأولي   من الساعة  6 ونص حتى 9  صباحا
والثانية من الساعة 12 ونص الى الثانية والنصف ظهرا 
وسأختار مثالين للشوارع الأول خط الملك فهد والمثال الثاني الدائري الخامس .

الوضع الحالي
فى فترة الذروة الأولي الصباحية  تشوف  خط الملك فهد من القرين الى العاصمة مسكر وزحمة  والسايد الثاني فاضي
والدائري الخامس من السالمية ( دوار الجوازات ) بإتجاه الشويخ أيضا مصكر وزحمة والسايد الثاني شبة فاضي .

فى فترة الذروة الثانية ( الظهر ) يصير العكس
خط الملك فهد من العاصمه بإتجاه الأحمدي إزدحام والسايد الثاني فاضي
والدائري الخامس من الشويخ بإتجاه السالمية مصكر والسايد الثاني فاضي

النظرية شنو تقول
الخطين أو السايدين ( الرايح والياي ) يصيرون بإتجاه واحد حسب مسار الإزدحام خلال فتره الذروة فقط مع تسيير طرق بديلة للخط الملغي .

بمعني أن فترة الذروة الصباحية خط الملك فهد يصير سايدين الرايح والياي بإتجاه العاصمة , والسيارات القليله اللى كانت بالسايد الثاني تسلك طرق بديلة مثل خط الفحيحيل أو المطار

وكذلك الخامس وكذلك بفترة الظهر .

هذه إحدى الخطط المرورية التي طبقت بالخارج وقرأت عنها وقد نجحت , طبعا فى فرق بين اللي يبي يشتغل واللي ماله خلق حتى يجرب , والناس راح تتعود بل بالعكس راح يصير الخط سالك ولامجال للزحمة لأنهم سايدين يعني 6 حارات 3 باليمين و3 باليسار

طبعا ضربت فقط مثال الخامس وخط الملك فهد , وقد تكون طرق أخري , فالموضوع يحتاج الى دراسة بشكل أشمل وإخلاص بالعمل ولابد من تعاون من المرور .




ومنا الى اللواء الدوسري للدراسة  , تري الموضوع خوش ,  ولو تجربة مدتها شهر , واللي أعرفه عن الدوسري حسب ما أسمع بأنه مجتهد ومخلص للعمل .
وإذا ماصار يسلم راسكم الكويت صارت سكراب من زمان ,  راده على الإزدحام










25 comments:

le Koweit said...

اتوقع لو يسوونها اهني ربعنا
بيعفسون الوضع اكثر ماهو معتفس
:)

عين بغزي said...

فكره حلوه بس الطرق البديله قد تزدحم كذلك ؟؟ على اعتبار اكثر شوارعنا من النوع سايدين فقط و اذا حولت لهم مستخدمين الطرق الرئيسية المغلق بالايضافة الي مستخدمي الشوارع البديله نفسهم راح تخلق زحمه اكثر في الشوارع البديله و يصبح الازدحام بين المناطق السكنية

اهممم

AM.SA.CHANNEL said...

كله أتحسب بس نحنا نعاني من الزحمة هههههههه

بس ذكرتني بشي قبل لا يشغلوون المترو
عموما دبي مثل ما تعرف مزدحمه من ناحية السكان ما شاء الله و أذكر يت فترة صدق الشارع ما يتحرك أحسبه بيزوووع من الزحمة و عادي تيلس في السيارة بالساعات و إذا إستوى حادث بتعفن أكثر

و أذكر إنهمطلعوا قرار لوزارة معينة إنهم ما يستخدمون سيااييرهم و الوزارة هي اللي بتوفرلهم باص بس ما نفع هالشي .. بعدين بدوا في سالك صح سالك ساعات يفقر الواحد لكن مفيد وقت الزحمة لو إنته في مكان مافيه سالك مايمشي الشارع على طول سير أي درب فيه ساااالك يتحرك، شارع الشيخ زايد قبل كان ما يمشي الحين إذا زحم أسيرله
و أحين بعد المترو أشووف الزحمة خفت لو إنها موجووده لكن خفت الحمد الله و لو زحمة الشارع يمشي ..
و سمعت يمكن العام على ما أعتقد
كانوا يبون يغيروون عشان ما تستوي صكت الوحمة مدارس و أشغال إنه المدارس تبدأ 8 و الأشغال 9 بس ما طبقووه
يممكن للمستقبل ...

يالله إن شاء الله تلقوولكم حل و ترتاحون من الزحمة لكن حاليا ما عندك إلا هالحل تنش من وقت و تسير الدوام

Anonymous said...
This comment has been removed by a blog administrator.
فريج سعود said...

خوش اقتراح بس وين الي يفهم ويحاول تطبيقة

وخوفك التغلغص الي بآخر الشارع يمتد تأثيرة و يوقف السايدين

السالفة يبيلها مخ فقط

Anonymous said...

انا كنت في كندا وكلامك صحيح بس الموضوع معقد اكثر مما تتصور

لان هذي التحويلات يجب ان تكون مخطط لها من الاساس فمثلا راح تواجه صعوبه باللفات ودخلت الدوارات
لاتنسى ان الشوارع في كندا مافي بينهم ارصفه وحواجز مثل اللي عندنا لذلك كان هذا الاختيار سهل تنفيذه بالنسبه لهم واعتقد انه صعب بالنسبه لنا اذا مو مستحيل

الحل يكون على اكثر من شكل بالنسبه للدائري الرابع لازم ما يكون في مخرج من المناطق التجاريه على الرابع فقط مداخل الى هذه المناطق يعني مثلا اللفه اللي عند صفة الغانم تقدر تدش الري لكن ما تقدر تطلع من هذا الشارع الى الدائري الرابع
اضافه الى منع تواجد الشاحنات في فترات معينه وفي شوارع معينه
مثلا ممنوع مرور الشاحنات في طريق الملك فهد من 7-9 صباحا

ترى انا حدي متحمس صدقت روحي

الزين said...

والله يا بنادول اقتراحج جميل
ولكن في ناس عمرهم ماراح يستوعبون العملية

مخهم مركب هالنمونه
وسبب الإختناقات المرورية ان كل من هب ودب عطوه ليسن

انا برايي التوسع بالمواصلات العامه
من اندر جراوند
وباصات

ولا تعطون كل وافد اجازه
الا اذا طبيعة عمله تحتاج ان يكون عنده سيارته الخاصه

اكثر جنسيتين مسببين ازمه بالشوارع
الهندية والفلبينية
يسوقون 50بشارع سرعته 80

Anonymous said...

أنت تقول أمريكا وكندا
أنت شايف الأشكال اللى عندنا
شايف الجناقل والجيزان
وين تعلمهم ووين يتعلمون
المخ حده جوتي
على قولت بودعيج خربوا الديره

panadool said...

le Koweit

الزميل الخوش
تحية لك
يسعدني تواجدك بالمدونة

والله صاج
ربعنا متعودين على الفوضة وعدم النظام


بس الواحد وده بالشيئ الزين لكن
:(

شكرا على مروركم من مدونتى

panadool said...

عين بغزي

الزميل أبو الكتب
تحية لك
يسعدني تواجدك بالمدونة


الخطوط السريعة أغلبها 3 خطوط
والفكرة فقط للخطوط السريعة


يعني مجرد إقتراح

شكرا على مروركم من مدونتى

panadool said...

AM.SA.CHANNEL

الزميلة من دبي
تحية لك
يسعدني تواجدك بالمدونة


زرت دبي منذ فتره قريبة
ما ودك تطلع من الزحمة

بس حاكمها خوش
مظبط القطار مبجر

عفارم عليه الصراحه

عقبال ميترو الكويت
:)

شكرا على مروركم من مدونتى

panadool said...

فريج سعود

الزميل شريف روما
تحية لك
يسعدني تواجدك بالمدونة


على قولتك
لو تدخل الناس دوره تدريبة شكلهم ماينفعون


ماراح يصير تغلغص

لأن الناس على طول الخط تتوزع على المناطق

يعني خط الملك فهد بإتجاه العاصمه شي يدش الجابرية يعدين حولي بعدين الدائري الثاني

بالتدريج السيارات تتوزع

وعلى قولتك يبيلها شعب ياباني أو ألماني ومو كويتي

شكرا على مروركم من مدونتى

panadool said...

Anonymous
تحية لك
يسعدني تواجدك بالمدونة

على طاري الدائري الرابع

مأساة بمعني الكلمه

لأن السايدين واقفين الرايح والياي

ماتفيد هالخطة مع الدائري الرابع


الحل الأشمل بالميترو

وايد حلول وأفكار

تحياتى لك

شكرا على مروركم من مدونتى

panadool said...

الزين
الزميلة الخوش
تحية لك
يسعدني تواجدك بالمدونة


فى حل النقل الجماعي لطلبة المدارس سيحل الكثير

والزحمة بإزدياد

والله بعد جم سنة ماتقدر تطلع من البيت


شكرا على مروركم من مدونتى

BookMark said...

خوش اقتراح والله
ياريت يُدرس ويطبق

بس المشكلة مااتوقع عندنا طرق بديلة
لأن الشوارع كلها زحمة!

ان شالله يوصل اقتراحكم وياخذونه بعين الاعتبار

Anonymous said...

في شغله اتوقع حلها اسهل من زحمة الخط السريع


الزحمة اللي تصير يم المدارس وفي مواقف المدارس

مو صج !

ذاك اليوم صبي شخط منظرة سيارتي واضطر يدعم سيارة ثانية صافطة عشان ايطوف وما يدعمني !!
تخيل ان في سيارة صافطة غلط كل من يا بيطوف دعمها من جدام
وفي النهاية محد استفاد ولا شي
it's crazy
:)

وبعد في شي
على طاري ساعة الذروة
انا اليوم طالعة من بنيد القار ورايحة باتجاه الاحمدي مرتين
مرة الساعة 6 ونص المغرب
ومرة الساعة 9 بالليل
كان زحمة وايد بالوقتين
وسامحنا على الكلام الوايد

KrKor said...

خوش اقتراح مع اني افضل تقسيم وقت خروج الناس للدوماتهم مثلا القطاع الخاص يطلعون الساعه 6 وعقبهم بساعه يطلعون موظفين الوزارت الحكوميه وبعدهم بساعه الشاحنات وعربات النقل العام والشاحنات الكبيره

ويتبع نفس النظام وقت انتهاء الدوامات
تحياتي

الوحده الوطنيــــه said...

صباح الخير بنادول

اعتقد لازم يغيرون من طريقة اصدار رخص القياده
و يخلون فترة القيادة فترتين
من الساعة ٦ الصبح الى ٢ الظهر مثلا
و الفتره الثانيه ٢ الظهر الى ٦ الصبح
و يخيرون اللي بيعطونه الاجازه اي فتره يختار
و اذا ساق خارج الفتره اللي اهو مختارها تنسحب اجازته
في ناس وايد يداومون دوامين الصبح و العصر و قاعد يزاحم
الناس اللي عندهم دوام واحد
هذا غير المشاوط بالفتره اللي اهو مو محتاجها
يعني اذا بتروح مكان بغير الفتره اللي اهي مسموح لك تسوق فيها
عندك الباصات ، او ربعك اللي فترتهم تعاكس فترتك
و تضبطون اموركم ويا بعض
وايد فوايد فيها منها توفر فليسات البانزين
و تقل شوفة الويوه الودره اللي قاعد نشوفها
صبح و ليل ليل و صبح ههههههههه

طبعا يكون فيها استثناءات لحالات محدده
مثل ما الداخليه كانت تسوي باصدار الرخص حق
الاطبا و دكاترة الجامعه و غيرهم

بس اشرايك بو البنادل بالاقتراح
:)
لا تستهين فيه ، فكر فيه شوي

علي إسماعيل الشطي said...

لا و نتطنز على مصر :) صرنا أردى

تقبل مروري عزيزي بنادول

panadool said...

BookMark

الزميلة الراقية
تحية لك
يسعدني تواجدك بالمدونة



مجرد إقتراح

الحل الأمثل بالميترو

هالسنه صايره الشوارع مو صج
سنه عن سنه تزيد الزحمه

تحياتى
شكرا على مروركم من مدونتى

panadool said...

Anonymous
تحية لك
يسعدني تواجدك بالمدونة

والله كل مكان زحمه
بعد جم سنه راح تصير الذروه طول اليوم

:)

خط الفحيحيل فظيع

شكرا على مروركم من مدونتى

panadool said...

KrKor

الزميل اللى ماعنده شغل
تحية لك
يسعدني تواجدك بالمدونة

نعم هذه من ضمن الخطط

تدريج بالدوامات

حتى المدارس

عندك بعد النقل الجماعي
باصات المدارس

وايد شغلات تخفف الزحمه

تحياتى الحارة

شكرا على مروركم من مدونتى

panadool said...

الوحده الوطنيــــه

الزميل الخوش
تحية لك
يسعدني تواجدك بالمدونة


بالنور والكرامه


فكره يديده

جديره بالدراسة

تذكرت فكرة سووها بطهران

السيارات بالأرقام الفردية يوم والزوجية يوم


خفت الزحمة وايد


كلووو يمشي

بس خل يصير شي يخفف الزحمه

أمس إختي تقول إنها بالشارع ساعتين ونص

مو صج الزحمه

تحياتى الحارة
شكرا على مروركم من مدونتى

panadool said...

علي إسماعيل الشطي

الزميل بوحسين
تحية لك
يسعدني تواجدك بالمدونة



مصر 70 مليون

إحنا 3 مليون

وييييييييييييييييييه
والله فرق

شكرا على مروركم من مدونتى

Anonymous said...

Elmawthoo3 ra7 yoo9al 7g eldoseri enshalla ;)