بنادول ورفيجه

صار حوار بينى وبين أحد الاصدقاء من النوع  الملقوف واللى مايعجبه شيي ويتدخل بكل شيئ  ويفرض رأيه وما أكثر هالنوع من الناس , وأول ما دش سيارتى أشتغل أسأله وتحلطم بعد ما شاف الجرايد والاوراق بالسيارة   وإليك الحوار بالعاميه الكويتية

 

الصديق :  أففف  شنو هذا اللى بسيارتك ورا   ؟؟؟    شصاير هالكثر جرايد  ؟؟؟

بنادول : أنا كل  يومين أسوى تصفيه على الجرايد , أصبر اليوم بس  وماتشوف ولاجريده

الصديق : يعنى هذوله جرايد يومين  ؟؟؟

بنادول : إي  ... هذا غير اللى بالبيت    !!!

الصديق : صل عالنبى .. أخاف أنت وكالة أنباء رويتر .. وبعدين ترى كل الجرايد نفس الاخبار

بنادول : لا مو نفس الاخبار . . تحاليل سياق الخبر أهتمام موضوع لآخر يعنى يعتمد ويختلف حسب كل جريده وتوجهها

الصديق : جم جريده تقرأ باليوم ؟؟؟

بنادول : من 8 الى 10 جرايد

الصديق : بيييييييييييه  من وين تييبهم ؟؟؟

بنادول : جريدتين مشترك فيهم وثنتين توزيع مجانى وثنتين اشتريهم والباجى  أقراهم بالنت .. حتى جريدة العفن .. قصدى الوثن .. الفتن.. أوووه  شسمها هذى ... ...... الوطن ...  حتى جريدة الوطن اقراها

الصديق : حالتك صعبة , إنزين وتحس انك مستانس ؟؟؟

بنادول : مو سالفة مستانس  .. ترى مو  وايد ... خل أقول لك شغله .. أنا باليوم أقرأ 10 جرايد تقريبا وأسمع نشرة أخبار 4 اذاعات وأشوف نشرة أخبار 5 قنوات تلفزيونيه .. غير البرامج السياسيه والحواريه  ....  وأنا أسوى جذى وانا حاب هالشي مو مجبور ..

الصديق : وشنو تستفيد ؟؟ كلها مضيعة وقت ؟؟

بنادول : الحين أنت كل يوم تشوف مو أقل من أربع مباريات بالدورى الاوربى   .... أسبانى ايطالى انجليزى فرنسى وتقعد بالساعات بالقهاوى شيشه وتشجيع وتصفق وتطق رقبة لما ييبون  قوووول  ...الخ    ولامره سألتك شنو تستفيد  .. أنا تركيبتى جذى ......  بالمرحله المتوسطة  كنت  أجمع مصروف المدرسة علشان أشترى مجلات وجرايد وكتب  من فلوس مصروفى .. مو كل مره بس وايد صارت معاى .

بعدها وخر عنى الصديق شويه وعفس ويه , مع إحساس إنى أنا مو صاحى

الصديق : أمحك عيشه الله يلوع جبدك , أنت مو صاحى ومعقد

بنادول : بعد أنا ما قلت لك عن المدونات والانترنت

الصديق : انترنت ومواقع ومنتديات عرفتها بس مدونات أسمع عنها وايد لكن ما أدرى شنو ؟؟؟

بنادول : مثل مواقع شخصيه على برنامج أسمع البلوغر فيها  كتابات اجتماعية سياسية رياضية وطنية   ...الخ   وباليوم أقرأ من 15 الى 20 مدونة .

الصديق : بعد المدونات فيها قراءة وجرايد وسياسة ... الله يعينك  ويبيلى حبة بنادول راسى يعورنى منك

هذا وهو مايدرى ان إسم مدونتى بنادول , فعرفت إنى توفقت  بالاسم لانى أييب عوار الراس حتى حق اللى يقرأ من مدونتى  

بنادول : بعد   الله سبحانة وتعالى  ما خلق الناس نفس الشي ... ومن شب على شيئ فقد شاب عليه . 

وصلته  وطلع روحى تحلطم وأسئلة

اختصرت وايد حجى  وكتبت المفيد ... طبعا هذا الصديق مو مال مدونات  فما أعتقد راح يوصل له  الحوار أو المقال عنه من خلال مدونتى  , بس اذا قراه راح يدرى عنه  واذا زعل كيفه لاتواخذنا وأقول له أبتسم أنت تقرأ بالمدونات

هدفى من كتابة ما سبق هو إنى أريد أن أبين لمثل هذى الانواع من الناس  .... لكل شخص إهتمامه الخاص ولو كان غريبا فتراه مستمتعا به , والامثله كثيرة , فالناس مختلفين فيما يعشقون ويحبون فعله , وكل شخص حسب بيئته وتنشأته وتركيبة عقله بأي إتجاه يصب , وإنشاء الله يكون أهتمامه يعود بالفائدة , فالإهتمامات والميول تدل على شخصية أصحابها .