2010/03/03

بنادول ورفيجه





صار حوار بينى وبين أحد الاصدقاء من النوع  الملقوف واللى مايعجبه شيي ويتدخل بكل شيئ  ويفرض رأيه وما أكثر هالنوع من الناس , وأول ما دش سيارتى أشتغل أسأله وتحلطم بعد ما شاف الجرايد والاوراق بالسيارة   وإليك الحوار بالعاميه الكويتية



 

الصديق :  أففف  شنو هذا اللى بسيارتك ورا   ؟؟؟    شصاير هالكثر جرايد  ؟؟؟

بنادول : أنا كل  يومين أسوى تصفيه على الجرايد , أصبر اليوم بس  وماتشوف ولاجريده

الصديق : يعنى هذوله جرايد يومين  ؟؟؟

بنادول : إي  ... هذا غير اللى بالبيت    !!!

الصديق : صل عالنبى .. أخاف أنت وكالة أنباء رويتر .. وبعدين ترى كل الجرايد نفس الاخبار

بنادول : لا مو نفس الاخبار . . تحاليل سياق الخبر أهتمام موضوع لآخر يعنى يعتمد ويختلف حسب كل جريده وتوجهها

الصديق : جم جريده تقرأ باليوم ؟؟؟

بنادول : من 8 الى 10 جرايد

الصديق : بيييييييييييه  من وين تييبهم ؟؟؟
بنادول : جريدتين مشترك فيهم وثنتين توزيع مجانى وثنتين اشتريهم والباجى  أقراهم بالنت .. حتى جريدة العفن .. قصدى الوثن .. الفتن.. أوووه  شسمها هذى ... ...... الوطن ...  حتى جريدة الوطن اقراها
الصديق : حالتك صعبة , إنزين وتحس انك مستانس ؟؟؟
بنادول : مو سالفة مستانس  .. ترى مو  وايد ... خل أقول لك شغله .. أنا باليوم أقرأ 10 جرايد تقريبا وأسمع نشرة أخبار 4 اذاعات وأشوف نشرة أخبار 5 قنوات تلفزيونيه .. غير البرامج السياسيه والحواريه  ....  وأنا أسوى جذى وانا حاب هالشي مو مجبور ..

الصديق : وشنو تستفيد ؟؟ كلها مضيعة وقت ؟؟

بنادول : الحين أنت كل يوم تشوف مو أقل من أربع مباريات بالدورى الاوربى   .... أسبانى ايطالى انجليزى فرنسى وتقعد بالساعات بالقهاوى شيشه وتشجيع وتصفق وتطق رقبة لما ييبون  قوووول  ...الخ    ولامره سألتك شنو تستفيد  .. أنا تركيبتى جذى ......  بالمرحله المتوسطة  كنت  أجمع مصروف المدرسة علشان أشترى مجلات وجرايد وكتب  من فلوس مصروفى .. مو كل مره بس وايد صارت معاى .



بعدها وخر عنى الصديق شويه وعفس ويه , مع إحساس إنى أنا مو صاحى



الصديق : أمحك عيشه الله يلوع جبدك , أنت مو صاحى ومعقد

بنادول : بعد أنا ما قلت لك عن المدونات والانترنت

الصديق : انترنت ومواقع ومنتديات عرفتها بس مدونات أسمع عنها وايد لكن ما أدرى شنو ؟؟؟

بنادول : مثل مواقع شخصيه على برنامج أسمع البلوغر فيها  كتابات اجتماعية سياسية رياضية وطنية   ...الخ   وباليوم أقرأ من 15 الى 20 مدونة .
الصديق : بعد المدونات فيها قراءة وجرايد وسياسة ... الله يعينك  ويبيلى حبة بنادول راسى يعورنى منك


هذا وهو مايدرى ان إسم مدونتى بنادول , فعرفت إنى توفقت  بالاسم لانى أييب عوار الراس حتى حق اللى يقرأ من مدونتى  

بنادول : بعد   الله سبحانة وتعالى  ما خلق الناس نفس الشي ... ومن شب على شيئ فقد شاب عليه . 


وصلته  وطلع روحى تحلطم وأسئلة

اختصرت وايد حجى  وكتبت المفيد ... طبعا هذا الصديق مو مال مدونات  فما أعتقد راح يوصل له  الحوار أو المقال عنه من خلال مدونتى  , بس اذا قراه راح يدرى عنه  واذا زعل كيفه لاتواخذنا وأقول له أبتسم أنت تقرأ بالمدونات

هدفى من كتابة ما سبق هو إنى أريد أن أبين لمثل هذى الانواع من الناس  .... لكل شخص إهتمامه الخاص ولو كان غريبا فتراه مستمتعا به , والامثله كثيرة , فالناس مختلفين فيما يعشقون ويحبون فعله , وكل شخص حسب بيئته وتنشأته وتركيبة عقله بأي إتجاه يصب , وإنشاء الله يكون أهتمامه يعود بالفائدة , فالإهتمامات والميول تدل على شخصية أصحابها .





35 comments:

رورو الشخبوطه said...

السلام..

بيه صرت مو صاحي ومعقد عشان تقرا جرايد و تشوف اخبار؟؟

عيل اللي مقزرها مباريات شيطلع خخخ..

مثل ماقلت الناس فيما تعشق مذاهب..

اللي ماحبيته بطريقة حواره مو لقافتها لا تحقيره لاهتمامت الغير..

ومشكور..

عثماني said...

متفق معاك بنادول

الناس فيما يعشقون مذاهب

وهي سبب اختلاف شخص عن شخص

:)

سلمان السعدون said...

بسم الله الرحمن الرحيم
اللهم صل على محمد وآل محمد
السلام عليكم ورحمة الله وبركاته


تحياتي


موضوع حيوي وجميل

بالنسبة لي لا أقرأ الجرائد إلا المانشيتات العريضة وعلى عجالة

أما الأخبار ففي السيارة اتابعها واما المدونات والمنتديات فقلة هم من اتابعهم

وبعض الاحيان ادخل اقرأ اول سطرين من البوست فإذا وجدته ذا اهمية اجهزت عليه وهكذا

وصحيح وكما تفضلت أن الناس بما يعشقون مذاهب

الأستاذ مزيكا said...

سلام
صراحه كان مصدع راسي من مباراة
الكويت وعمان وقلت ابي بنادول

صح كل شخص له اهتمامته الغريبه مثلا عندي هواية مشاهده وليس ممارسة مشاهدة لعبة التنس بشكل جنوني يصير استنفار في البيت حتي في بعض الدول التي تقام فيها بطولات عالميه وتعرض بالساعه 2 بليل او 4 الفجر حسب فرق الوقت
احط المنبه على الساعه وحبة بنادول يمها احتياط

Tamer Nabil Moussa said...

السلام عليكم

كلامك صحيح اخى بنادول

كل انسان ولة اهتمام مختلف عن الاخر والغريب ان البعض يستغرب من الاشياء التى اهتم بها ويقول انها مضيعة وقت ولاينظر كما قولت الى اهتمامة وحبة لة


الهواية والاهتمام بها شىء رائع وبالاخص عندما يكون مفيد وليس مضر لى او لااخرين

ربنا يوفقك ويكرمك

مع خالص تحياتى

why me said...

مساء الخير


أقولك انا أتابع الاخبار
ومن توصل النشره الاقتصاديه الكل يقولي دوري المحطه


وانا اقول
ليش خل نشوف شنو اخر الاخبار



يزفوني يقولون لي

مادري من العقارات والعمارات اللي مصففه عندج عشان اتابعينهم


!!



انا احب جذي مودي جذي انتوا اشحارق خبزكم

؟




شي غريب هالاوادم

من أمسك الرموت يقولون يالله الحين اتحط لنا اخبار

لووووول



من تعليقاتهم والله يالي احساس اني عيوز

!



لول

فآطِمهْ said...

وضع السيآرة عجيب :p
:
و رفيجك لـ علمه أهو حآلته صعبه مع كل إحترآمي و تقديري
حرآم أصلن يطوف يوم كآمل من غير مآيقرآ و لو صفحه وحده عن أي مجآل
و أنآ تحسفت على أيآم رآحت و مآ قريت فيهآ
الله يعآفي الجآمعه لو مو الدكآترة و لآ كآن شي إجبآري جآن للحين مو ذآك الزود مع القرآءة
و كذلك المدونه لهآ دور كبير و خلتني أحب شي اسمه قرآءة
و أيضاً أحس من كثر مآ طآفتني أيآم مآقريت فيهآ ودي ألحين طول اليوم بس أقرآ بس هم لي وآجبآت لآزم أقوم فيهآ
:
أهنيك أخوي على مجآلك و شغفك للقرآءة فـ خير جليس و بـ الذآت هذآ الزمآن "كتآب"
و شكراً

خالف تعرف said...

لا تذكرني بهالنوعيه

وبيني وبينك

اذا تلقف احد منهم وسألني سؤال عابر مذكور بجريدة
احقره وازفه اقول اقرأ جرايد وبعدين حاجني

الحبيب يبيني الخص له الجرايد!!

حياتي هدف مو عبث said...

حقيقةً أنا أشوف إنك وايد تقرأ جرايد
:)
عن نفسي أقرأ بس بالنت الجرايد
و4 جرايد بس

وطبعاً كل إنسان يختلف عن ما يحب فعله الثاني فلا تستغرب إنه تكون ردة الفعل غريبة وكأنك تفعل شي خارق أو تافه
وطبعاً أشوف اللي يتابع المبارايات إنسان فاضي .. لأنها لعبى مملة وبس

:)

Sami said...

صبحك الله بالخير
لووول
كل هالحنه و هم طلب منك بنادو ,كثر من هالمواضيع نبي انشوف الجانب الفكاهي بشخصيتك مو كله سياسه .
و بعدين انت شفيك وايد متحامل على الوطن ..معنها اكثر جريده مقروئه

رهبرى said...

صباح الخير


ما أكثر هالنوعيه من الناس على قولتك

الهوايات والاهتمامات تختلف من شخص لاخر

كل حسب شخصيته

شكرا علابوست المهم والظريف

Anonymous said...

I can only manage a 20 minutes main news in the morning with breakfast and another 30 minutes resume in the evening the rest can wait wa2ella ill need a subscription to Panadol

نمووول said...

انا ما اقرأ اكثر من جريدة باليوم وما امر عليها عالسريع بعد ما شاء الله عليك 10 جرايد باليوم
قريت مرة كتاب عن الجواسيس ويقولون ان الواحد فيهم كان يقرأ 6 جرايد انا انصدمت وقتها 6 مو شوية يعني انت الحين تنفع معلم لهم ..

تصدق المدونات احسها افضل من الجرايد يعني تقرأ الخبر وبعد تقرأ معاه تعليق صاحب المدونة وتعليقات القرءة فتعرف راي الناس بالقضية والموضوع

اسمحلي بس صاحبك هذا هو السبب في استمرار صناعة البانادول

ثاني مرة لا تقول 10 جرايد
ترى عيون البعض تلهب
ولا ما تؤمن بالعين ؟

ما شاء الله ما شاء الله
الله يزيدك علم وثقافة وقوة ذاكرة
اتوقع لو نقيس قدراتك العقلية المتعلقة بالذاكرة بتتخطى المستوى الطبيعي بوايد

ارد واقول ما شاء الله
ربي يحفظك

واحة خضراء said...

عدد من هذه الاشخاص مثل الي وصفته لما تقول له انك تقرأ رواية مثلاً قالك انت فاضي !


لا تنثني عن طريقك يا بندول فالانسان بدون الاطلاع والقراءة بما يدور حوله لا يمتلك ضمير حي يعي بما يجري حوله

في النهاية هذا جزء من صنع الانسان لشخصيته

بالتوفيق

Safeed said...

طبيعة الإنسان انه يعتبر نفسه مركز الكون ويبي كل شي يكون مطابق له
لانه يشوف نفسه المقياس ويعتبر المختلفين معاه شواذ في اختلافهم

كما ان الطرق تختلف وان كانت كلها تؤدي لنفس المنطقة
فالمعرفة أو المتعة او السعادة او اي هدف آخر للانسان .. تتعدد طرقه

حقيقة بسيطة .. يتجاهلها الكثيرون

:)

بو ذياب said...

ليش المخاسير وتشترك بالجرايد اقراهم كلهم على النت ارخص :)
لان بيني ةبينك اغلبهم مايسوون سعر الورق اللي انطبعوا عليه ..
اذا تبي نصداقية اخوي اسمع البي بي سي وجرايدنا اخذ منها الجمبزة وكل واحد يطبل حق معزبة..
,,,,,,,,,,,
وعلى طاري الرياضة ملاحظ اغلب اللي يدمنون على متابع المباريات تلاقيهم بالصج مايدلون طريج النادي :) وقاعد يشيش ويقول الرياضة

خدمات البحث العلمي said...

انت مثلي في القراءه انا عشقي من يومي صغيره الكتب والمكتبات حتى واذا طلعت مع صديقاتي لازم امر المكتبه على طريقي وتشوفنا نتساحب هم انا ابي اقعد وهم يبون يمشون

يعطيك العافيه استمتعت بمدونتك

panadool said...

رورو الشخبوطه


كل واحد وأهتمامه

وأنا أتابع مباريات بس مو كلها

تحياتى الحاره

panadool said...

عثمانى


صحيح أخى عثمانى

ولو تلاحظ أصحاب الاهتمامات المتشابه متوالمين


شكرا على مرورك من مدونتى

panadool said...

خادم العتره

شكرا على إبداء الرأى

وتحياتى الحاره لك

panadool said...

MSMAAR


أنا محارب المنتخب

ومادريت عن تأهل المنتخب الا من الهرنات والحوسه اللى بالشارع

تحياتى الحاره لك ولك منى أحلى حبة بندول

panadool said...

Tamer Nabil

شكرا على مرورك من مدونتى

panadool said...

نفس الحاله


لما أحص التلفزيون عالاخبار يسوون لى سالفه

تحياتى الحاره

وشكرا على المرور من مدونتى

panadool said...

ٵنثے ملآئكيـﮧ ~

ليش كاتبه شكرا



كتبى


تشكرات

panadool said...

خااالف تعرف


لووووووووووووووووووووووووول


ميخالف فيده ولاتصير نحيس


اذا يستاهل طبعا

تحياتى الحاره لك

panadool said...

حياتي هدف مو عبث



الرياضه زينه
بس متابعتها بشكل جنونى مايسوى


شكرا على مرورك من مدونتى

panadool said...

Sami

يا صباح النور والورد

بالنسبه لقناة الوطن ما أحبها
لانها تغذى النزاعات الطائفيه

وهى عدوة التكتل الشعبى


لا تقف دائما الى جانب قضايا الوطن وهى على رأس الاعلام الفاسد


شكرا يالزميل الخوش وتحياتى الحاره لك

panadool said...

رهبرى




الطيور على أشكالها تقع بالضبط كما قلت


شكرا على المرور من مدونتى وتحياتى الحاره لك

panadool said...

melicieuse


لوووووووووووووول


أشوه انها نص ساعه

وحبة بندول بعد

لووووووووووول


تحياتى الحاره لك

panadool said...

نمووول



جاسوس عاد لوووووووووووووووووول


وترى يعتمد من واحد لآخر

يعنى فى واحد سريع بالقراءه وواحد بطيئ


تحياتى الحاره لك وشكرا على ابداء الرأى

panadool said...

واحة خضراء



روايه أو غيرها

القراءه والاطلاع مفيده

تحياتى الحاره لك

panadool said...

Safeed



صح كما تفضلت

أكو ناس يبون الكل مثلهم بالاهتمام والهوايات وما يتحملون ناس ثانيين مختلفين عنهم أشوه انى مو من هالنوع

تحياتى الحاره لك

panadool said...

بو ذياب

لا عاد مو كل الجرايد

أكو جرايد مفيده وزينه ومحايده

وعلى قولتك الشيشه والرياضه تلاقيهم بعد المباراة كلهم يصيرون محللين وفاهمين

طبعا لاتشوف أجسامهم كلش رياضيين

تحياتى الحاره لك وشكرا على المرور من مدونتى

panadool said...

مبدعه

الله يعافيج

حياج بالمدونه

وتحياتى الحاره

king said...

king
الكلام صحيح يا بانادول كل انسان عنده ميول مثل بعض الناس عندهم تربية الطيور وخصوصا تربية الكواسكو
وهذه هوايه والاخر يحب يقرأ واناس مختلفين يا حلو بس المهم توجد هوايهاما اللى ما عنده هوايه شتقول عنه فاضى من مقهى الى فراره فى سيارته ويمكن يعبى بنزين مرتين فى اليوم

شكرا