2010/08/19

بنادوليات رمضانية












الجمعية
التسوق بالسوبر ماركت ممتع وخصوصا قبل الفطور , وشكل الناس مضحك وهي مستعيله وخايفه من إن بعض الأغراض تخلص فتراهم سريعين وماكو وقت أو إلحق قبل ما يخلص .



 ودائما أسمع هذا السؤال عند محلات الحلويات ( هذا شنو وهذا شسمه ) , الغالبية يذهبون لمحلات  الحلويات  لشراء نوع معين حابه أو مشتهيه ولكن أغلب محلات الحلويات تنصب الكمائن من ديكور  وطرق عرض جميلة ورائحه شهية فتخرج من المحل وأنت شايل جم نوع بدلا من نوع واحد . 

 

نصيحتي للي ماعنده كنترول ..... لا تتسوق بالجمعية  قبل الفطور ( وأنت يوعان )  , كل شيئ  تشوفه جدامك  تتخيله قوزي , تدش الجمعية تبي شي واحد وراح تطلع وأنت شاري أغراض بعشرين دينار  ....  عادي .





كيدهن لعظيم
بعض البنات ماخذين السالفة وكأنها عناد وخصوصا فى ساعات الصيام , إبتسامات مشبوهه  وحركات ولبس  وهذه النظرات التي هي من سهام الشياطين , وما تزيد وتحلي إلا على الشباب وقبل الفطور , المثير والغريب بأن البنات هم الذين يكسرون عين الصبي  
  أيضا نصيحي للشباب اللي يصعب عليه غض النظر خصوصا مع الجنس اللطيف وحتى لا يجرح صيامه  عليك بالنوم ,   النوم خوش ,  فنوم الصائم عباده . 






التلفزيون
طوفان المسلسلات فى رمضان , غريب هذا الوضع  !!   بالسنه فى 12 شهر وبالإمكان توزيع المسلسلات على أشهر السنه , الكثير من الأعمال الجميلة تظلم برمضان , ففي السابق كان التلفزيون الحكومي في منافسة مع mbc  ودبي وغيرهم أما حاليا القنوات الكويتية ماشا لله 10 تقريبا وكل قناة  عندها 5 مسلسلات ويقولك كلهم  حصريا .



ملوك الكوت قد يكون من البرامج التي سحبت الكثير من المشاهدين لكونه فكره جديده ونسخه خليجية أولي  



أما حليمه بولند على mbc  , المشكلة إنها تعرض برنامجها قبل الإمساك بدقائق  يعني غير موفقه بالوقت كلش , وسنه بعد سنه تطور باللبس والحركات والميوعة ,  يا حلومه  هذا رمضان شهر العبادة شهر الإلتزام ,  ليش ما تطلعين طول السنه  , إشمعني رمضان ؟؟

فى هالسنه حلومه مسويه ريجيم من النوع الغريب ضعيفه من فوق ومتختخه من النص ونازل ,  وبعدين تتباها وتفتخر  وايد بمؤخرتها ... أول  ما يبدأ البرنامج ظهرها للكامره ومؤخرتها  ,  إذا الإجابة صح أو خطأ تعطيك لفه محورها الخصر والمؤخرة  وأغلب حركاتها بالبرنامج تشير لنفس الغرض , شفت حلقة وحده منها يمكن فى الحلقة  الثالثة وبعدين بطلنا محنا شايفين .







الديوانيات  ومبارك عليكم الشهر
فى أول عشره أيام من رمضان يعتاد أغلب الكويتيين ويتزاورون من داوانية لأخري   حتى كل واحد يبارج الشهر للثاني , هذه السنه وبرفقة الوالد الله يحفظه  مسوي جدول كل يوم من بداية رمضان من 5 الى 7 دواوين بالليله الوحده طبعا الحضور معاه إجباري ولامجال للإعتذار ,  وهو نوع من تمرين لياقه  ولكن فى كل ديوانية لازم تشرب شاي أو قهوه وعصير ليمون أو برتقال والحلو والموالح  فأضرب هالعدد بخمسه أو سته ولما ترجع  البيت  ناطرينك ومسوين سحور , ما أدري جم كيلوا بزيد بها لشهر .



عن الديواوين   اللى مايعرف الكويت من خارج الكويت  ويشوف بعض القنوات التفزيونيه وبعض البرامج اللي فيها مداخلات يقول وكأن هناك حرب أهلية  على وشك الإندلاع , صحيح إن الإعلام هو إنعكاس على الحالة الشعبية   , ولكن مهما كان العراك وسوء التفاهم فالتعايش الودي المتشابك المختلط  بين الكويتيين سمه متجذره بهم , فتدخل الديوانية وتشوف الكوكتيل من كل طائفه وأصل ( بوعلي وبو مصلفح وبوأنس وبومطلق طايحيلة ضحك مع بعض ) , فتشعر بالإرتياح وتقول الحمد لله  لسه الدنيا بخير وهذي من بركات الشهر الفضيل .







جزء القرآن
أنا مقصر جدا  بقراءة القرآن  فشهر رمضان هو الشهر الوحيد الذي أقرأ بل أختم فيه  القرآن وباقي السنه بعيد عنه , أحس بأن القراءة بالمسجد تختلف عن المنزل أو مكان العمل وكأن المكان مرتبط بالكتاب , كانت قراءتي بدون تركيز مجرد لقلقة كلام الهدف منها إنهاء الجزء  فإستمعت لنصيحة أحد الأصدقاء وهي القراءة بالمسجد فسيكون بها نوع من الخشوع والتركيز .

وفعلا  في هذا العام قررت أن أقرأ الأجزاء فى المسجد وكم هو شعور جميل , وعادة أختار أحد العواميد أو مكان يكون مخفيا , فإني أخشي كثيرا من أن يشاهدني شخص يعرفني فيظن أن ما أفعله هو من الرياء , ونصيحتي لمن يحس أو يشعر بثقل قراءة القرآن  أو بدون تركيز أو تسبب الملل أو أو أو أو   ليجرب هذه الطريقة وهو قرائته بالمسجد فسوف  ينجلي أغلب الشعور  منه . 








من الجدول اليومي المشي
المشي أو الرياضة وأنت صائم مفيد جدا حيث يحرق السعرات المخزونة بالجسم لأنك تبذل الجهد والمعده خالية  , ففي السنوات السابقه كان الممشي فى المناطق عصرا وقبل الفطور يعج بالمشاية حيث إن الجو كان لطيفا 
 أما الآن وبسبب دخول رمضان في فصل الصيف صار الممشي فى المجمعات  مثل الأفنيوز رايح وياي كامل من الداخل فيها 2 كيلو متر , أما الدور الثالث بمجمع المهلب فهو ممشي داخل المجمع وبفكره جديده ,  بالنسبة لى مافي وقت فالنهار طويل والجو حار والليل قصير .


بالنهاية هو شهر الخير والبركة , تشوف البركة بالموائد العامرة وتشوفها بالمساجد , البركة تشوفها بصلة الرحم والزواره  والحطب يطيح بين الزعلانين ,  لم لا وهو شهر الرحمه وشهر الله  , وأتمني  عطلة نهاية إسبوع سعيدة للجميع .





22 comments:

bokeh of magic * said...

تصوير جميل عن حالتنا برمضان ,
اما حليمه سالفتها سالفه مسكينه تكسر خاطري و الله ,
يعطييك العافيه

le Koweit said...

بخصوص سالفة الجمعية
انا برمضان وغيره
اذا دخلت الجمعية وانا جوعان اترس العربانة
مع اني اكون رايح اشتري فرشاة اسنان @_@
لووووول

مشكلة والله
لازم الواحد ما يروح الجمعية الا وهو شبعان :)

Sami said...

شهر الجدول المزدحم :)

-mate said...

بالنسبة لمؤخرة حليمة.. إذا عُرف السبب بطل العجب

http://www.youtube.com/watch?v=d4EvVErNhVE&feature=player_embedded

نمووول said...

هههههههه فصلت على الصور
حليمه تنطر الناس يتسحور عشان يحلون فيها يعني هاهاها

مااتابع التلفزيون
بس احياناً اشوف مسلسلات اجنبية الفير

شكراً

عاضـه said...

وييييع حليمه مو حلوه
ويييي يا ربي ما ادري ليش مخلينها مذيعه
لوووووول

نفس الفقارى ان شافوا مليونير
يقولون الغنى غنى النفس مو غنى الفلوس
لوووووووووووووووووووول

مركبنا said...

ممممم

اجرام تدخل الجمعية وانت يوعان .. احيانا اذا حسيت نفسي بخورها لانى جوعانه ما اخذ وياي بوكي اخذ فلوس بيدي وتكون اقل وطبعا راح اتعيجز ارد مره ثانية اجيب فلوس ..

المسلسلات اكبر اساءة للمجمع الكويتى
والبشاعه الاكبر هى حليمة ..
لا اقصد الجمال لا ولكن صورة الفتاة الرخيصة التى تستدرج المشاهدين بالجمال والتصنع والتفصخ !

صرنا برمضان اذا طلعنا من الديرة نستحي نقول انا احنا كويتيات ..
عشان ما يقولون لنا انتوا زي المسلسلات !

ميزة الشهر هذا العبادات الجماعية .. مادش المسجد باي وقت الا في ناس قاعده تقرا تروح التراويح زحمة ..
ترجع بيتك تقول الحمدلله الخير ياقي وكثير

BookMark said...

تصوير "خوش" للرمضانيات

قواك الله :)

panadool said...

bokeh of magic *


الزميلة الطفله الشقية
تحية لك
يسعدني تواجدك بالمدونة


حليمه مو عارفه شتسوي بعمرها
تبي صار إعلامية كبيره بأي طريقه
الله يعينها


شكرا على مروركم من مدونتى

panadool said...

le Koweit

الزميل العزيز حقوقي
تحية لك
يسعدني تواجدك بالمدونة

لووووووووووووول

حط البوك بالسيارة وأخذ معاك دينارين



شكرا على مروركم من مدونتى

panadool said...

Sami

سامى ياسامي
تحية لك
يسعدني تواجدك بالمدونة

بالفعل
ماكو وقت كلش
يادوب تسوي المهم


شكرا على مروركم من مدونتى

panadool said...

-mate

الزميل الأرسنالي
تحية لك
يسعدني تواجدك بالمدونة


حسبي الله عليك
أشوه إني شفت الفيديوا بعد الفطور

مو وقته


شكرا على مروركم من مدونتى

panadool said...

نمووول

نمول الغالي
تحية لك
يسعدني تواجدك بالمدونة


والله وقته برنامج حليمه مو خوش

وزين تسوي ما تتابع التلفزيون
صاير زحمه وخنبقه

شكرا على مروركم من مدونتى

panadool said...

عاضـه

الزميل النادوس عاضه
:)

تحية لك
يسعدني تواجدك بالمدونة


إهي حلوه
لكنها ماصخه بحركاتها وبطريقتها
وتبالغ بمكياجها ولبسها وايد
يعني حلاته الشيئ بالبساطه


شكرا على مروركم من مدونتى

panadool said...

مركبنا

المركب الغالي
تحية لك
يسعدني تواجدك بالمدونة


خوش فكره
وأسويها وايد سالفة البوك

بالنسبة للعباده
سبحان الله وقت الجماعه الإحساس غريب
قد يكون الدافع معنوي


الحمد لله
فى كل مكان وزمان الجميل والسيئ موجود


شكرا على مروركم من مدونتى

panadool said...

BookMark

الزميلة اللى متوهقه بالتغييم
:)
تحية لك
يسعدني تواجدك بالمدونة


الله يقويج

يعني كل واحد يكتب وينقل بعض الشعور والتصرفات فى رمضان من وجهة نظره

وقد تختلف من شخص لآخر

شكرا على مروركم من مدونتى

ri7ana said...

الي ضحكني الصور الي مختارها
احسس انتا بالصج نكوتي :)
الله يجزاك خير على البوست الخفيف
وبالنسبه للافشات الي حاطهم ماعندي تعليق الا شالرابط بين رمضان وحليمه

رورو الشخبوطه said...

حلو اجواء رمضان سواء الدينيه او الاجتماعيه وحتى التلفزيون..

وحليمه ماوقع رجيم لبس + عمليات او مساج عموما الله يسلم لبنان :)

مشكور اخوي..

panadool said...

ri7ana

الزميلة الريحانه
تحية لك
يسعدني تواجدك بالمدونة


موشرط
فأنا أعاني من إنفصام بالشخصية
:)


الرابط
إن مومال هالشهر حليمه
مال شهر ثاني

تتدلع وماتدري شستسوي حركات
يعني لازم تراعي الصائمين وخصوصا الشباب

تحياتى الحارة

شكرا على مروركم من مدونتى

panadool said...

رورو الشخبوطه
الزميلة العزيزة أم الشخابيط
تحية لك
يسعدني تواجدك بالمدونة
بالضبط
جميلة أجواء رمضان


ورمضان كريم عليج وعلى الجميع

حليمه على قولتج طايحتله قعده بلبنان
واللبنانيين شطار بهالسوالف



شكرا على مروركم من مدونتى

A* said...

حبيت كل ما كتبت نقد لطيف و تصوير جميل لحياتنا الرمضانية ..
برمضان، اتثيقل من لزواره و اليمعات لكن بس اروح ما ودي اطلع ..
اليمعة برمضان لها طعم ثاني احساس غريب وحلوو

الجمعية.. الكويتيين كله جذيه يخمون الجمعية خم جنه صج بياكلون !!
واخرتها ثلاث ارباع الاكل يودونه لجان ولا مسايد..
ولو شفت بيت بدون فيمتو جنه فيه شي غلط ! بيتنا واحد من
هالبيوت مانحب الفيمتو ;P

حليمة .. شفيكم عليها ؟ ترا مسكينه لول
مابي اعلق !! بس الله يهديها


و مبارك عليك باجي الشهر و تقبل الله طاعتكم اخوي

panadool said...

A*

الزميلة التي قبلت فرسا
تحية لك
يسعدني تواجدك بالمدونة


علينا وعليج يارب


حليمه اللى قاعده تسويه غلط
فى فرق بين الفن والمصاخه



حط بالج لاتطيحين من الفرس
:)

شكرا على مروركم من مدونتى