2010/10/21

بيوت الكويتيين





















غالبا يكون بوست نهاية الاسبوع بوست إجتماعي  خفيف , بوست اليوم  عن بعض العجائب والغرائب التي رايتها بمنازل بعض الأصدقاء والأقارب .

لا ابالغ إذا قلت إن الكويتيين أكثر شعب بالخليج  يتفنتق ويتفنن  بالبيوت والأثاث والتصميم , حتى أصبحت تجارة الأثاث والديكور والتشطيب المنزلي من أنواع التجارة المربحة جدا بسبب كثرة الإقبال عليها .
 
فيلا لصديق  بالمنقف ,  إستغربت من شيئ بغرفة النوم الماستر , شفت إن الطوفة اللي تفصل غرفة النوم عن حمام الماستر عبارة عن جامه , يعني طوفه شفافه  , اللي يدش الحمام يستحم أو يستخدم المغسلة ,  ينشاف من قبل اللي بالغرفة  , بإعتبارها غرفة نوم خاصة للزوجين ولكنها فكره غريبة , إنزين قلنا زوجين والنظر حلال بس للحمام شنو تبي تشوف بعد !!!!!!


منزل  أبل بالضاحية , زرته  عندما خرجت من المدرسة وبصحبة صديقي أيمن فؤاد أبل , تخيل وأنت تدش منزل وفيه زوجان من النمور السيبيرية , لووووووووووووول  , والحياة طبيعية والأمن بالمنزل مستتب , كان المنزل يحوي على قرد و طيور وببغاوات  وبلابل وأحواض سمك بصراحة المنزل ممتع للغاية .


أيضا بغرفة النوم شقة أحد الأصدقاء بمنطقة بيان , كان يجهز الشقة لقرب موعد العرس فأراد المساعدة لبعض الأمور   , ولكنني تفاجأت بالسقف في غرفة النوم وهي مرايا على طول الفراش , يعني لما تنام  بالفراش على ظهرك وتطالع سقف الغرفة راح تشوف روحك بالمرايا الملزوقة بالجبس العلوي لسقف الغرفه , يعني وقت الشغل ما يطوفه شي ويشوف كل الزوايا الأمامية والخلفية . 

 
منزل بمنطقة السرة ( من القرايب )  جكوزي على طرف الصاله  , حمام سباحه بالمعيشة  , مصبغة بالسرداب  , صندوق صغير  خاص للأكل ( أسنصير ) يطلع من المطبخ و مرتبط  بالمطابخ التحضيرية   في أجنحة الأدوار العلوية , الستائر تتحرك برموت كنترول , مشالله  خوش بيت ,  الله يهنيهم .

منزل آخر مهووس بالآثار والأنتيك لفت نظري  سياج زجاجي  حول قطعة  زولية إيرانية  , عرفت فيما بعد  إن سعرها 35 ألف دينار  , قلت له أنزين بما إنها غاليه وماتبي أحد يدوس عليها علقها عالطوفه , قالي ما تصلح أعلقها لأنك ماراح تعرف سرها ؟؟؟؟؟ 
السر هو إن الزوليه تعطيك لون فى كل إتجاه من الإتجاهات الأربع !!!  يعني أربع ألوان   وفعلا  عند كل إتجاه شفتها بلون مختلف أحمر أزرق أخضر ذهبي , ومصنوعه من الحرير قبل 25 سنة .


وسمعت عن بيت حاط راس تمثال صدام بالديوانية , وبيت حاط الفيراري بالصالة كما بالصورة فى الأعلي  , وبيت قفل البيبان على بصمة اليد .


وعلى طاري البيوت , أخبرني أحد الأصدقاء وهو يعمل بالبلدية بأن المنازل المطله على الدائري الرابع من جسر المغرب الى جسر الخالدية ستحال الى لجان  التثمين فى السنة القادمة  , حيث إن هناك مشروع توسعة للدائري الرابع والمطلوب أخذ بعض المساحات من تلك المناطق , وهي الروضة السرة العديلية الخالدية قرطبه اليرموك , يالله بعد شتبون رزق وياكم , الفوت على 150 ربية , عاد بروحها هالبيوت  أسعارها ماشالله بالعالي ,  هالدور تثمين .
ماشالله الشيخ سالم العلي التثمين لاحقه لاحقه  ؟؟؟





عطلة نهاية إسبوع سعيدة للجميع







37 comments:

Icarus said...

"يعني وقت الشغل ما يطوفه شي ويشوف كل الزوايا الأمامية والخلفية . "


ما عليه الولد مدمن افلام بورن وسع صدرك!!! أزمة وتعدي!!!

---------------

وبالنسبة للأخ الي حاط فراري بالصالة.........ولد الزياني مثلا؟؟؟

-------------------


شخصيا أفضل البيت يكون بسيط حتى تاخذ راحتك فيه ، فلو كنت حاط زولية بمبلغ خيالي وكل شوي احاتي واحد من اليهال يحوس حواليها....بالعون حتى في بيتي ماراح انام مرتاح!!!

ri7ana said...

ماضحكت الا على سالفه سالم العلي
لول
انزين بقولك شي واذا ماعجبك وحسيت انه ملف سري امسح الجزء من الكومنت
اذا كان عندك معرفه او خبر عن سبب مقتل هدايه السالم قولي لان في سبب مجهول وماني عارفته ويوم صارت سالفتها كنت للحين ياهل وماذكر التفاصيل
اتمنى اذا عندك معلومات غير ان العازمي ذبحها عشان سبتهم لان هالعذر موداش مخي كل يوم احد يسب العوازم بالنكت والمواقع ماشوف كلانكشكوفات متطشره
الفضول ذبحني موقادره انام
وشكرا

نمووول said...

انا ابي الي حاط الفيراري بالصالة
ما يعطيني ياها واعطيه طاولة طعام انسب حق هالمكان ؟

دكتور كويتي said...

اكو بيت بقرطبة فيه 47 حمام
وتسلم على الموضوع

Sami said...

منو هالحمار " اسف على الكلمه" الي حاط راس صدام بالدوانيه..حلاته تقول اسمه

ناعمة الهمس said...

تثمين ؟؟؟؟؟؟؟؟

الله يهنينه

بس اللي عجبني غرفة النوم و المرايا اللي فوق
والله فلته

aL-NooR . said...

اي و الله البيوت بالكويت
الوان و اشكال
مرة دشيت فريج ولا حول اربع بيوت لونهم بني غامج
يكافينا الشر الفريج بعز الظهر مغم
اقول حق اختي الظاهر غاروا من بعض
بس انا بالنسبة لي البيت من برة ماله داعي يتلون الوان صارخة ولا غامجة حيل
يا حلو الشراحة

:)
خوش بوست
have a nice weekend

BookMark said...

الله يقطع ابليسك :)

|:| DUBAI |:| said...

راس صدام ليش؟
خلنا نخلص من بيتنا و اطرشلك الصورة
: )

أحب أنا الاستايل الاوروبي
القديم .. اللي تحس كأنك تمثل
في الريف

يا الله

و احب البيوت اللي بو دور واحد

بس الشكل يكون راقي

!!

عين بغزي said...

لووووووووووول

panadool said...

Jako

جاكو العزيز
تحية لك
يسعدني تواجدك بالمدونة



صحيح البساطه خوش بالبيت
ولكن الكثير من الناس تتباها ببعض أعمال الديكور والمقتنيات ليكون المنزل مميزا

والناس منازل
بيت الفقير مو مثل بيت الغني

والقناعه خوش
وهي كنز


الحمد لله على كل حال

شكرا على مروركم من مدونتى

panadool said...

ri7ana

الزميلة العزيزة
تحية لك
يسعدني تواجدك بالمدونة


سالم العلي وجابر العلي ملوك الأراضي والتثمين بالكويت

من الستينات وهم شغالين

الله يزيدهم


أما عن موضوع هدايا سلطان السالم
اللى أعرفه


هو أن هدايا سلطان السالم تعرض لقبيلة العوازم بطريقة خاطئة فى إحدي مقالاتها بمجلة المجالس


والنقيب خالد نقا أخذته الحمية وقتلها


وليس هناك سبب آخر

بس الناس بالكويت تحب السوالف والإشاعات
والفضول

:)



فقاموا بإخراج وتأليف القصص عن هذا الموضوع


يعني ماكان المفروض تكتب هدايا السالم هذا الكلام عن قبيلة العوازم أو غيرها

والله أعلم

الحين نامي بسلام

:)

شكرا على مروركم من مدونتى

panadool said...

نمووول

نمول العزيز

تحية لك
يسعدني تواجدك بالمدونة

لووووووووووووووول


أنت حط الكامرور أو الترانز
:)


هذي صورته إنتشرت بالكثير من المواقع

حركات

تقعد بالصالة والسيارة داخل


تحياتى الحارة

شكرا على مروركم من مدونتى

panadool said...

دكتور كويتي

الزميل العزيز
تحية لك
يسعدني تواجدك بالمدونة

ماشالله تبارك الرحمن

إنزين جم غرفه وجم مطبخ وجم صالة بالبيت

شكرا على مروركم من مدونتى

panadool said...

Sami

الزميل الخوش
تحية لك
يسعدني تواجدك بالمدونة

هذا البيت موجود بالقرين

حاط راس تمثال صدام عند الباب
علشان من تدش ضربه بالنعال

عاد حطوا صورته مره
الراس مسحك من كثر ضربات القنادر

:)

شكرا على مروركم من مدونتى

panadool said...

ناعمة الهمس

الزميلة الناعمه
تحية لك
يسعدني تواجدك بالمدونة

تثمين

تذكرني بقصة الدائري الخامس من دوار الجوازات الى تقاطع خط الفحيحيل مع الخامس

تم تثمين بيوت الرميثية وشارع عمان

علشان يكبرون الدائري الخامس

كان هذا بالثمانينات


ما موضوع المراي فوق الفراش

ولدنا سكسي موليه

يبي يشوف كل شيئ

حلاته زوجته توهقه وتصك الليتات

لوووووووووووووول


يصير مشروعه فاشل


شكرا على مروركم من مدونتى

panadool said...

aL-NooR .

الزميلة النور
تحية لك
يسعدني تواجدك بالمدونة

طبعا
بما إننا فى دولة حارة

المطلوب الألوان المريحه والبارده

على قولتج الشراحه

البيت من بره ليكون بسيط

الإهتمام من الداخل


للحين مالقيت بيت أحمر

:)

وردي
برتقالي بني أزرق موجوده هالبيوت

وخصوصا بجنوب السرة


شكرا على مروركم من مدونتى

panadool said...

BookMark

الزميلة اللى تحب المبادله
تحية لك
يسعدني تواجدك بالمدونة



ليش

لووول

بعد آخر الإسبوع بريك من السياسه


تحياتى الحارة
شكرا على مروركم من مدونتى

panadool said...

|:| DUBAI |:|

الزميلة العزيزه من دبي
تحية لك
يسعدني تواجدك بالمدونة



راس صدام علشان يتبارك بضربات القنادر



إنشالله بيتكم بيت عامر

أهم شيئ البركة بالبيوت

بعض البيوت تييب الفقر والنحس لأهل البيت نفسهم


إنشالله منزل عامر


عاد بالإمارات بشسرعه يطلع لكم بيوت
أما عندنا لازم تنطر 37 سنه
:)

أو تشتري بأسعار أغلي من عقارات لندن


الحمد لله

شكرا على مروركم من مدونتى

panadool said...

عين بغزي

الزميل العزيز والخوش
تحية لك
يسعدني تواجدك بالمدونة



:)

شنو على بالك


كويتيين حق الفناتق والفسق عند ويهك

شكرا على مروركم من مدونتى

Sami said...

اشوه

ri7ana said...

بالنسبه للشييخ ضحكت لان اهو يالله من فضلك
مو محتاج تثمين :p
واذا على ماتقول هاذي السالفه الصجيه لهدايه السالم
مع احترامي لكل بدوي ماعنده سالفه :)
مؤبد عشان مقاله اتحدى كل الناس قرتها
وشكرا

le Koweit said...

ماشالله
يعني بس بيتنا اهو العادي التقليدي؟
@_@

الجودي said...

ديرتنا على الأحداث إلي تصير فيها و الأخبار الملتهبة إلا إن فيها شعب يحب الفناتق و مزاجه رايأ على قولت المصريين في هالسوالف

::


يسعد لي مساك بنادول و الجميع

و أتمنى لك نهاية أسبوع سعيده و الجميع

المقوع الشرقي said...

يسلمك يا زميلنا الخوش
تشرح قصة الفراري بالصالة

اشدعوااا
ولا بالاحلام

بصراحة ما تغبطت الا اللي عندهم مصبغة

شقااا
أفتكووو

:))

زهرة said...

والله احترق قلبي على البيوت والتثمين اليوم خسرانه بالبورصة مبلغ وقدره
ودمعة عيني مدونتك حلوة لقيتها في جريدة مباشر

MoonFaCe said...

الصراحة...فضااوة و ماكو شغل و بطران

فيلسوف said...

إلى كل محب لمحمد صلى الله عليه وسلم
و محب للكويت

مهم جدا
اتمنى منك المشاركه

http://felsoof.blogspot.com/2010/10/blog-post_22.html

panadool said...

le Koweit

الزميل الخوش حقوقي
تحية لك
يسعدني تواجدك بالمدونة


وبيتنا بعد

:)


إنشالله تفوز بالمليون
وتاخذ بيت إسطوري
بالمنطقة اللى تبيها

:)


شكرا على مروركم من مدونتى

panadool said...

الجودي

الجودي يالجودي
تحية لك
يسعدني تواجدك بالمدونة

عاد صج
بالفناتق والبيوت الكويتيين فله


بالنور والكرامه

شكرا على مروركم من مدونتى

panadool said...

المقوع الشرقي

الزميلة الخوش
تحية لك
يسعدني تواجدك بالمدونة

:)

مصبغة بالبيت ومطبخ مركزي

وعندهم بعد مكان مسوينه نادي صحي وأجهزة رياضية


بيت إسطوري الصراحه

الله يرزق الجميع



أما عن الفراري حسب اللى عرفته
بأن 6 أشهر بالصيف يحط الفراري بالصالة

وباقي السنة لما الجو يصير بارد يطلعه من الصالة ويسوقه عادي بالشارع

حركات

البيت بالجابرية

ولد كاكولي

والله أعلم


:)


شكرا على مروركم من مدونتى

panadool said...

زهرة

الزائرة الجديدة
تحية لك
يسعدني تواجدك بالمدونة


أعلم بوجود بنادول على موقع مباشر

والبورصة لما تخسرين لاتبيعين لما يصعد

محد يبيع بخساره


إلا إذا مضطره

الله المعين


المهم الصحه والعافية

:)


شكرا على مروركم من مدونتى

panadool said...

CoConUt


الزميلة سوالف فطوم
تحية لك
يسعدني تواجدك بالمدونة


بعد كل واحد وسوالفه

والفاضي يعمل آضي

شكرا على مروركم من مدونتى

panadool said...

فيلسوف

الزميل الدكتور
تحية لك
يسعدني تواجدك بالمدونة


أبشر
بالمشاركة والتفاعل مع كل شيئ مفيد وإيجابي



تحياتى الحارة
شكرا على مروركم من مدونتى

Engineer A said...

ياحلو البيوت الصغيرة ملمومة ومجكنمه وهم مريحه وتنفع حزة الأزمات لي اعبنت الخدامة عن رغبتها بالسفر لديرتها!!! :))

اذا بيت صغير مقدور عليه اما البيوت الكبيرة فمصيبة!! :)

panadool said...

Engineer A

الزميلة المهندسه
تحية لك
يسعدني تواجدك بالمدونة


إي والله
أسمع وايد ناس يمدحون الشقق
من حيث الجو الحميم والمكان الملموم

حتى المنازل الصغيره البسيطه


المهم إن البيت مريح لأهله ويفي بإحتياجاتهم
والبساطه زينه

تحياتى الحارة
شكرا على مروركم من مدونتى

Manal said...

موضوع جميل

بانادول
خل اصورلك البيت الي احنا فيه في بريطانيا
:))

ما في احلى من البساطة والله

كل هذي الاشياء تملها العين بعد مدة
وتغييرها صعب لان سعرها وتكلفتها تكون غالية

الحمد لله على كل حال

:)