2010/05/19

تقرير اليوم






اليوم قبل الذهاب لساحة الإرادة  مريت آخذ دشاديشي من  خياط ( المقص الذهبي ) موجود بشرق بالعمارة اللي يم التسهيلات , هذا الخياط الإيراني الأثري موجود بالكويت من 1980 , وبعد صامد بالغزو صاحب الخياط  , أتذكر منذ الإبتدائي والمتوسط أخيط دشاديشي عنده برفقة الوالد والأعمام , فهو خياط العايلة

  صار أذان المغرب صليت بمسيد شعبان بشرق وهو يم التسهيلات , بعدها رحت سوق شرق , شخباري من زمان مادشيت هالسوق , صاير هدوء وحده كوول  , البركة فى (الأفنيوز ومارينا) هالمجمعين إسحبوا الهيلق عندهم وخفف على سوق  شرق, طبعا المواعد كان على كيفك , وسبحانه الله بسرعة يبينون , إذا متزوجين تشوف البوز هالطوله وهم قبال بعض  ... وإذا مومتزوجين تشوف الغشمرة والتكركر والضحك .


صورة التجمع بعدسة بنادول ( إشفيه بوعدسة )


بعدها رحت ساحة الإرادة , الحضور ممتاز , ومفاجأة الحضور هو الدكتور أحمد الخطيب الذى وقف الحضور دقائق تصفيقا وإحتراما له  , وأنا مستغرب من عباس الشعبي اللي قاط عمره بكل مكان  ,  صاير الأكشن ماله حده قوى وقاعد يم الأعضاء

 كنت واقف فى الخلف  ,  المنصة  أمامي وأنا من جهة اليسار , جدامي مذيع قناة الراي عبدالله بوفتين  على يساري شخص لابس لبس رياضي وحاط رنة التلفون إسعاف ,صوت السرينة ,  ضحكني لما  رن تلفونه وتعومس وراح يتكلم عند مواقف السيارات الظاهر وزارة الداخلية عنده قوية  , يمه واحد ماشا لله طويل ومكرش ولابس بلوزه كحلية , يتابع المتحدثين وتعابير ويهه تفيد على التذمر والإستياء ( ماينلام من الوضع ) 

 أفضل كلمه قالها الخطيب هي ( أحنا بالكويت كل شيئ صار عندنا بالتلش , مابقا  لنا إلا حرية الرأي وهم بعد بياخذونه منا )  , كما قال بأن الظروف الحالية التى تيعيشها الكويتيين هى من أسوأ الظروف  حاليا  , فى قطو أبيض مضيع أمه ذبحني أروح يمين وراي أروح يسار هم بعد  وراي , يطالعني وأطالعه  لو أسود جان طقيتله سلام لأنى أخاف من البزون الأسود  , أما البزون الأبيض يعنى خوش , والله كان لزقه مو صج .

من مشاكل ساحة الإرادة إنها تقع بظهر القهوة الشعبية  ففى الطريق لمواقف السيارات لازم تشم ريحة ( صويخات الجبود ) يااااااااااي  وأنا مو متعشي وناوى أسوى رجيم لأن وزنى زايد 400 جرام   (( :  , لكنى ضعيف جدام الجبود والعرايس وريحتهم تكفخ الراس
 دشيت وطلبت ماعون كبده وماعون عرايس , يمي أثنين شياب يتكلمون بصوت عالي أسمع واحد يقول حق الثاني ( هذوله جنه خلصوا عرسهم ) .. يقصد  الإ عتصام فى ساحة الإرادة
الثاني يرد و ويقول ( ما صارت  والله ما صارت ... كل ماصار شيئ هلووا علينا أشكال وألوان وتجمعوا هني وسووا   لنا إزدحام وشرطة  حتى مواقف القهوة واقفين فيها ومكرفونات  وقلوبات .... لمن لا يعرف قلوبات يعنى إضاءات أوكشافات وهو مصطلح كويتي أثري .....  وتصفق ما أدرى شيبون , حتى قروض قالوا على هالشوارب وللحين ماشفنا شيي غير الحجى ما عندهم , قايل لك خل نغير القهوة ونروح اللي عند مستشفي الأميري  وايد أبرك من هالقهوه ...
هذا نموذج من الإحباط الحاصل بين الناس بسبب الحكومة والمجلس , حتى الشياب يننوهم  حسبي الله على اللي كان السبب



        بعد ما صورت الصينية  الشياب الإثنين اللي يمى يطالعوني مستغربين
ولسان حالهم يقول ( إشفيه هذا موصاحى يصور الأكل اللى ياكله )


بشكل عام حضور ممتاز ,  تنظيم الشرطة تمام , وشكل الكامرة اللى على الشبة يمين المنصة  جنها نادوس , كلمات قيمة قيلت من المتحدثين ومن الأمور التي سمعتها وإستغربت منها هو أن لا يوجد بالكويت قاضى تحقيق , معقولة الى الآن  يوجد عندنا قصور من هذا النوع ونحن رواد السياسة والقضاء بالخليج  وإحنا قضائنا عمره 50 سنه تقريبا ,

 مطالب المحامين التي ذكرت وكان مطلب إيجاد  قاضى تحقيق إحداها   ,  كانت مطالب مهمه ويجب على أحد أعضاء مجلس الأمة أو اللى كانو بالحضور أن يتبنى هذه المطالب أحسن من سالفة اللف على الوزارات كل يوم الصبح  لتخليص المعاملات وشغل الوسايط .


دمتم ودامت الكويت بلد الحريات ,  هذا اللى طلعنا فيه من دولتنا بلد الحريات وهم بعد حريات مو كاملة , الحمد لله على كل حال








18 comments:

Anonymous said...

الله المستعان يا بنادول وبالعافية مره ثانية لم تروح اطلب لنا عرايس لقراء مدونتك المميزة و عوافي على قلبك

أخوك مشاري السندي

le Koweit said...

للاسف ما قدرت احضر صارتلي ظروف

بس خوش تقرير صراحة
تنفع تصير مراسل :P

Sami said...

خوش تضامن :))..قز و صويخات ..عليك بالعافيه

فريج سعود said...

اولا انا بعد مريت على خياط المقص الذهبي واستذكرت ايامه وفكرت اروح له بس خايف من المجازفة

تغطيتك للاعتصام اشبه بتغطية سائح ياباني

:))

why me said...

لووول

طول الوقت اقرا البوست واكرك من الضحك


تقريرك وايد حلو و دمه خفيف


بس ما ضحكني الا الشياب يوم قالوا اشفيه هذا يصور الاكل


لوول



:)

الدســتور said...

بالعافية
بس غدا سترى بعينك التعديلات التي نقدم على القوانين ؟

ولكن سترى من سيقف معها من النواب ومن سيقف ضدها

panadool said...

مشارى السندي

يسعدنى وجودك بالمدونة

الله يعافيك

والعرايس ملوت القهوه لذيذه
فهي جديره بالتجربه إذا مو مجربها

شكرا على مروركم من مدونتى

panadool said...

حقوقي

الزميل محامى المستقبل

تحية لك

يسعدنى وجودك بالمدونة


خيرها بغيرها

وملحوقه إنشالله

أى خوش تقرير

تقرير

مدون ناشئ جربنا نسوى تقارير يمكن أصلح



شكرا على مروركم من مدونتى

panadool said...

Sami

الزميل صاحب المدونه المتميزه

تحية لك

يسعدنى وجودك بالمدونة


لوووووووووول
مافيها شيئ

الإعتصام الساعة 8 وكان فى وقت فاضى

قلنا نحوس شوي على مايبدأ الشغل

ووبعدها اليوع كافر

المهم تمت العمليه بنجاح

وشكرا على مروركم من مدونتى

panadool said...

فريج سعود


الزميل الشريف

تحية لك

يسعدنى تواجدك بالمدونة


رجاءا
هذا خووش خياط لاتقول عنه جذى

:))


حجى عباس بنفسه شغال بالمحل وهو مخلص بالشغل


أحسن من خياييط
هالأيام

طلعولنا خياييط مصريين وزلمات

حتى يسولفلى واحد من الربع إن البنغال قاموا يخيطون دشاديش


شكرا على مروركم من مدونتى

panadool said...

why me


الزميلة اللى إسمها بالكويتى
إشمعنا آنه

تحية لك

يسعدنى وجودك بالمدونة


حبينا نسوى تقرير بصيغه تخفف من الرسمية


وبالنسبة للشياب لما صورت الأكل بغيت لاشعوريا أفر الكامرة صوبهم وأصور بوهتهم وهم مستغربين
كان شكلهم كلش وهم يطالعونى



شكرا على مروركم من مدونتى

panadool said...

أبو الدســتور

الزميل العزيز

تحية لك

يسعدنى تواجدك بالمدونه


الله يعافيك حبيبى

وإنشاء الله تقدم هالتعديلات الله يسمع منك

واللى بيوقف ضد مثل هذه التعديلات القانونيه

والله ماأدرى شنو ينقال عنه



شكرا على مروركم من مدونتى

أبو فارس said...

اسمحلي بالمرور
دمت من الاوال
تحياتي

Anonymous said...

؛)بصراحه أحلى شي سوالف الشياب

ونظراتهم لك وإنت تصور الأكل عاد تخيل لوكنت شارحلهم عن البلوق شراح يقولون ههههههههه

وبالنسبه لسوق شرق مرات عقب الدوام امره الله لايوريك المواعد وقلة الأدب والله إنهم يرفعون ضغط الواحد من أشكالهم المقرفه حالهم حال المهلق سنتر إلي حرمت أروحله الظهر لو شنو يصير

الفيدرالي said...

تقرير جميل عزيزي بندول مع تسجيل تحفظي على هذا التجمع :))

تحياتي

panadool said...

ابو فارس

الزميل العزيز

تحيه لك يسعدنى وجودك بالمدونه


شكرا على مروركم من مدونتى

panadool said...

q8-lawyer


الزميله المحاميه

تحيه لك

يسعدنى وجودك بالمدونه



أحل من قز الظهر ماكو
وخصوصا بنص الأسبوع

هالايام بدا الحر والجو مايساعد



شكرا على مروركم من مدونتى

panadool said...

علي إسماعيل الشطي

الزميل اللى مطول الغياب

تحيه لك

يسعدنى وجودك بالمدونه


عزيزى على أنا فاهمك بالضبط شنو بتقول

وأشاركك فى بعض تحفظاتك

ولكن سبب المشاركه للحريات وليس للجاسم


شكرا على مروركم من مدونتى